БНСУ дахь ХНХҮТ-ийн дарга П.Батхүлэг 2025 оны 3 сарын 18-ны өдөр “БНСУ-ын Хөдөлмөр, нийгмийн хамгааллын төв” сургалтын байгууллагын гүйцэтгэх захирал И Чүнжигийг хүлээн авч уулзлаа. “БНСУ-ын Хөдөлмөр, нийгмийн хамгааллын төв” сургалтын байгууллага нь олон талт үйл ажиллагаа эрхлэн явуулдгийн нэг нь гадаад ажилчдыг ахисан түвшинд хүргэх мэргэшүүлэх сертификат олгох сургалт юм. Хоёр тал Е9 визээр хөдөлмөрийн гэрээгээр ирж ажиллаж буй иргэдэд зориулсан сэрээт машин жолоодох эрхийн үнэмлэх авах үнэ төлбөргүй дэмжлэгт сургалтын үйл ажиллагааны хүрээнд санал солилцов.

Төв нь хөдөлмөрийн гэрээт иргэдэд сургалтын талаарх мэдээллийг хүргэх, бүртгүүлэх үйл ажиллагааг дэмжих зэргээр хамтран ажиллана. Тус сургалтад хамрагдсан гэрээт иргэд мэргэшсэн сертификат эзэмшихээс гадна ур чадвартай ажиллах хүчний Е-7-4 виз рүү шилжихэд мэргэжлийн үнэмлэхний нэмэлт оноонд тооцуулах боломжтой.

Бүртгэлийг ХНХҮТ-ийн сошиал хуудас болон вебсайтад хандан хийлгэж болно. Эхний ээлжийн сургалт 4 сарын 19-ний өдрөөс эхлэх ба амралтын өдрүүдэд үргэлжилж онолын 60, дадлагын 20 цагийн хичээл судална.

Холбогдох мэдээллийг төвийн 02-2266-8228, 02-2278-8030 дугаарын утсаар авна уу?