Улсын их хурлын гишүүн О.Саранчулуун БНСУ-д томилолтоор ажиллах явцдаа тус төвөөр зочлон гэр бүл, хөдөлмөр нийгмийн хамгаалал, нийгмийн даатгалын чиглэлээр иргэдэд үзүүлж буй үйлчилгээний явцтай танилцав.

Төвийн дарга Б.Жаргалмаа Гэр бүл, хөдөлмөр нийгмийн хамгааллын яам болсонтой холбоотойгоор эрэлт хэрэгцээний хүрээнд хөгжлийн бэрхшээлтэй иргэдийн судалгааг гаргаж, БНСУ-ын Улсан хот дахь “КИМС” хүүхэд хөгжлийн мэргэшсэн төвтэй хамтран хөгжлийн бэрхшээлтэй хүүхэдтэй эцэг эхчүүдэд зориулан 2025 оны 8 сарын 30-ны өдөр сургалт зохион байгуулах талаар танилцуулав.

Мөн Юханы их сургуулийн Эрүүл мэндийн тэнхимийн хөдөлмөрийн сэргээн засах эмчилгээний чиглэлээр МУ-ын АШУҮИС-д суралцаж байгаа оюутнуудыг оюутан солилцоогоор сургах ажлыг хэрэгжүүлэх асуудлаар судлан, цаашид хамтран ажиллахаар харилцан тохиролцсоноо хэлэв.

БНСУ-д амьдарч байгаа сургууль завсардсан болон суурь, бүрэн дунд боловсрол эзэмших хүсэлтэй суралцагчдад зориулж БНСУ-Монгол улсын мэргэжилтэн, технологи эзэмшигчдийн солилцооны холбоо, Монгол Улсын суурь болон бүрэн дунд боловсрол нөхөн олгох сургалтыг Боловсролын ерөнхий газар, Сүхбаатар дүүргийн Насан туршийн суралцахуйн төвтэй хамтран зохион байгуулж албан ёсны бүрэн бус дунд болон бүрэн дунд боловсролын гэрчилгээг олгохоор ажиллаж байгаа талаарх мэдээлэл өгөв.

О.Саранчулуун гишүүн хилийн чанадад оршин суугаа иргэдийн эрхийг хамгаалах, ялгаварлан гадуурхалт, эрүүл мэндийн байдал нэн ялангуяа гэрээт ажилтнуудын үйлдвэрлэлийн осол гэмтэлд өртөлтийн байдал тэдгээрт олгосон нөхөн олговор, нийгмийн болон сэтгэцийн эрүүл мэндийн байдалд анхаарч холбогдох шийдвэр гаргахаар ажиллаж байгаа талаар дурдлаа.

Түүнчлэн УИХ-ын гишүүн О.Саранчулуун эрх зүйн акт боловсруулах  судалгааны ажилдаа төвийн үйл ажиллагаанд хэрэглэж буй мэдээллийн санг ашиглахаар тохиролцож, мөн Юухан их сургуультай  хамтран ажиллах болсныг дэмжиж, сэтгэл зүй, хөдөлмөрийн харилцаа, НД-ын чиглэлээр цахим сургалтуудыг тогтмолжуулан ажиллаж байгаад талархаж байгаагаа илэрхийллээ.