2025 оны 3 сарын 16-ны ням гарагт БНСУ-д амьдарч ажиллаж, суралцаж буй залуус цуглаж тус улсад ажил хөдөлмөр эрхлэх боломж нөхцөл, гарц гаргалгааны талаар ярилцлаа. Уулзалтыг “Гэрээний залуусын нэгдэл” ТББ, Гённам аймгийн Гадаад иргэдийг дэмжих төвөөс Сөүл хотод зохион байгуулж, БНСУ-д суралцагч Монгол оюутны нэгдсэн холбоо, “Намү” хүүхэд, гэр бүл, сэтгэл зүйн төв хамтран ажиллав. Мөн “AZ” даатгал, “GME” олон улсын мөнгөн гуйвуулга, “UA Properties” үл хөдлөх хөрөнгө зуучлалын байгууллагууд дэмжин оролцсон.
Энэ үеэр БНСУ дахь Хөдөлмөр, нийгмийн хамгааллын үйлчилгээний төв нийгмийн даатгалын хууль тогтоомж, хөдөлмөрийн харилцаа, хөдөлмөрийн аюулгүй байдлын талаарх мэдээлэл, сурталчилгааг 70 орчим иргэдийн гарт хүргэн 38 иргэнд хөдөлмөрийн харилцаа, нийгмийн даатгал, сэтгэл зүйн эрүүл мэндийн үйлчилгээ үзүүллээ.
“Залуусын хөдөлмөрийн гарц” нэгдсэн уулзалт 3 хэсэгтэй өрнөсөн. Эхний хэсэгт хөдөлмөрийн гэрээгээр ажиллагчдад тулгамдсан асуудлыг хөндсөн бол дараагийн хэсэгт оюутан залуусын, гурав дахь хэсэгт оршин суух эрхгүй иргэдийн хөдөлмөрийн харилцаанд тулгамдсан асуудлыг тус тус авч хэлэлцэн хэсэг тус бүрд илтгэл тавьж, панел хэлэлцүүлэг өрнүүлсэн эхэлсэн цагаасаа дуусан дуусталаа оролцогчдын идэвх, ярилцах асуудал шийдлээр дүүрэн, үр өгөөжтэй арга хэмжээ боллоо.
