БНСУ-ын Хөдөлмөр эрхлэлт, хөдөлмөрийн яамны харьяа Хөдөлмөр, халамжийн газрын судалгааны хүрээлэнгийн хэлтсийн дарга Жу Хён Кютай 2024 оны 01 дүгээр сарын 17-ны өдөр уулзалт зохион байгууллаа. Уулзалтаар Е-9 хөдөлмөрийн гэрээгээр ажиллаж буй Монгол Улсын иргэдийн мэдээллийн бааз бүхий цахим санг үүсгэх, албан хэрэгцээнд шаардлагатай статистик тоон мэдээллийг салбар тус бүрээр гарган цаг алдалгүй нэг эх сурвалжаас боловсруулан иргэд, олон нийтэд хүргэх, цаашилбал, Монгол Улсын Хөдөлмөр, нийгмийн хамгааллын яаманд бодлогын дэмжлэг үзүүлэх чиглэлээр үр дүнтэй хамтран ажиллах тухай санал солилцов. Мөн БНСУ-д хөдөлмөр эрхэлж байхдаа үйлдвэрлэлийн осолд өртсөн монгол иргэдийн ослын шалтгааныг бүс нутаг, ажил мэргэжлээр нарийвчлан тодорхойлох ажлыг хэрэгжүүлэхээр боллоо.
БНСУ-ын Хөдөлмөр, халамжийн газар нь үйлдвэрлэлийн ослын шалтгаан нөхцөлийг тогтоон, осолд орсон иргэдэд даатгалын нөхөн төлбөрийг олгодог байгууллага бөгөөд манай төвтэй 2021 оны 6 дугаар сараас хойш хамтран ажиллаж байна. Тус байгууллага 2004-2023 оны хооронд Монгол Улсын 3,947 иргэнд үйлдвэрлэлийн ослын нөхөн төлбөрт 51,132,528,030 воныг олгожээ.
