Анх 1942 онд 4-хөн ажилтантай байгуулагдаж байсан нийгмийн даатгалын байгууллага нь 80 жилийн түүхэн хугацаанд Улаанбаатарт Нийслэлийн нийгмийн даатгалын газартай, 21 аймаг, 9 дүүрэгт хэлтэстэй, 3 дүүрэг, 12 суманд тасагтай, 330 суманд байцаагчтай, БНСУ-д Нийгмийн даатгалын тасагтай үйл ажиллагаагаа явуулдаг, нийгмийн даатгалын хууль тогтоомжийг хэрэгжүүлэх, нийгмийн даатгалын сангийн орлогыг бүрдүүлэх, ажил олгогч, даатгуулагчдыг нийгмийн даатгалд хамруулах, нийгмийн даатгалын сангаас тэтгэвэр, тэтгэмж, төлбөр, зардлыг хуулиар тогтоосон хугацаанд олгох, цахим үйлчилгээг нэвтрүүлэх зэрэг чиг үүргийг хэрэгжүүлдэг Монгол Улсын Засгийн газрын хэрэгжүүлэгч агентлаг болтлоо өргөжин тэлжээ.
Энэхүү түүхэн гавьяаг бүтээж бий болгосон Нийгмийн даатгалын байгууллагын үе үеийн удирдлагууд, ХНХ-ын сайд, Нийгмийн даатгалын үндэсний зөвлөлийн дарга А.Ариунзаяа болон НДҮЗ-ийн гишүүд, НДЕГ-ын дарга Д.Зоригт, дэд дарга Г.Саран, дэд дарга Т.Батмөнх, Бодлогын хэрэгжилт, судалгааны газрын дарга Ц.Ганцэцэг, ХНХЯ-ны Нийгмийн даатгалын хэлтсийн дарга Б.Батжаргал, Нийслэлийн НДГ-ын дарга Г.Болорсүх нарт болон нийгмийн даатгалын салбарт ажиллаж буй нийт ажилтан, албан хаагчид, иргэд даатгуулагч та бүхэнд Монгол Улсад Нийгмийн даатгалын байгууллага үүсч хөгжсөний түүхт 80 жилийн ойн мэндийг хүргэе!
ХНХЯ-ны харьяа БНСУ дахь Хөдөлмөр, нийгмийн хамгааллын үйлчилгээний төв нь нийгмийн даатгалын салбарын 80 жилийн түүхэн замналын 10 гаруй жилийнхийг нь бүтээлцэж, Нийгмийн даатгалын тасгаараа дамжуулан яамны чиг үүргийн дагуух төрийн үйлчилгээг хилийн чанадад ажиллаж амьдарч буй монгол иргэдэд үзүүлж, үйл ажиллагаагаа жилээс жилд сайжруулан, түншлэл, хамтын ажиллагааг өргөжүүлэн тэлж хувь нэмрээ оруулж ирсэндээ баяртай байна.
Та бүхэнд Нийгмийн даатгалын салбарын түүхт 80 жилийн ойн мэндийг ахин дэвшүүлж, ажлын амжилт, амьдралын сайхан бүхнийг хүсэн ерөөе!
БНСУ ДАХЬ ХНХҮТ-ИЙН ДАРГА Д.БАЯРМАНДАХ
