БНСУ дахь ХНХҮТ энэ онд Солонгосын үүрэн холбооны тэргүүлэгч операторуудын нэг “КТ” ХК-тай хамтран ажиллахаар боллоо.
Өнөөдөр буюу 2022 оны 2 дугаар сарын 25-ны өдөр тус компанитай хамтран ажиллах санамж бичигт төвийн дарга Д.Баярмандах, “КТ” ХК-ийн захирал Гү Хён Му нар гарын үсэг зурж баталгаажууллаа.
Энэхүү санамж бичгийн хүрээнд хийгдэх ажлууд нь Солонгос улсад ажиллаж амьдарч буй монгол иргэдэд чухал ач холбогдол бүхий бодит ажлууд болж хэрэгжих юм.
Солонгост ажиллаж амьдарч буй иргэдэд хамгийн чухал хэрэгцээ нь харилцаа холбооны асуудал байдаг. Хилийн дээс алхахтай зэрэгцэн энэ асуудал үүсч танил талаасаа асууж сураглан зуучлагчдаар дамжуулан гар утасны дугаартай болох, дагалдах үйлчилгээ, үйлчилгээний нөхцлүүд зэргийг бүрэн гүйцэд ойлгоогүйгээс болж дараа нь төлбөрт унах, хохирох, дугаараа удаан хугацаанд ашиглаж чадахгүй байх зэрэг асуудал байнга үүсдэг.
Тэгвэл ХНХҮТ, “КТ” ХК-ний хамтын ажиллагаа энэ асуудлыг эцэслэж өгөх юм.
Хэрэв монгол иргэд “КТ” үүрэн операторыг сонгон үйлчлүүлсэн тохиолдолд тус компани дараах боломжуудыг хэрэгжүүлж ажиллахаар боллоо.
Үүнд, юуны өмнө БНСУ-д ирж ажиллаж буй хөдөлмөрийн гэрээт иргэд болон монгол иргэдэд чанартай, баталгаатай харилцаа холбооны үйлчилгээг үзүүлнэ. Ингэхдээ монгол хэл дээр зөвлөгөө өгөх монгол ажилтантай салбар төв байгуулж ажиллуулна. Энэ ажил үр дүнгээ өгвөл тус салбар төвийг олноор байгуулна. Монгол иргэдэд дээд зэргийн чанартай үйлчилгээг хөнгөлөлттэй үнээр авах боломж нөхцлийг олгоно.
Үүнээс гадна “КТ” ХК-ний гар утасны дугаарыг сонгон хэрэглэдэг Монгол Улсаас ирсэн хөдөлмөрийн гэрээт иргэдэд эргэх холбоо бүхий дата үүсгэж цар тахал, аюул осол, цаг агаарын үзэгдэл зэрэг гэнэтийн онцгой нөхцөл байдал үүсэхэд болон БНСУ дахь Хөдөлмөр, нийгмийн хамгааллын үйлчилгээний төвөөс гэрээт иргэдэд хандан зар түгээх шаардлага тулгарсан үед нэг дор 40 мянга хүртэлх иргэнд яаралтай мэдээ, мэдээллийг мессэжээр хүргэж байхаар боллоо.
Солонгосын харилцаа холбооны салбарын нэр хүнд бүхий компаниудын нэг “КТ” компани нь зөвхөн үүрэн операторын хүрээнд хязгаарлагдахгүйгээр монгол иргэдийн хөдөлмөрлөх, ажиллаж амьдрахад таатай нөхцөл үзүүлэх бусад асуудалд ч дэмжлэг үзүүлж хамтран ажиллахаа санамж бичигт тусгажээ.
