Өчигдөр буюу 2021 оны 3 дугаар сарын 29-ний өдөр Хөдөлмөр, нийгмийн хамгааллын яамны харьяа БНСУ дахь Хөдөлмөр, нийгмийн хамгааллын үйлчилгээний төвийн дарга Д.Баярмандах БНСУ-ын Сөүл хотын Сэжунрү иммигрэйшний даргатай уулзаж ярилцлаа.
Уулзалтын үеэр ХНХҮТ-ийн дарга Д.Баярмандах цар тахлын хүнд үед эх орон руугаа буцаж чадахгүй байгаа хөдөлмөрийн гэрээний хугацаа нь дууссан иргэд болон аяллын, богино хугацааны визээр ирсэн ч хил хаагдсантай холбоотойгоор явах боломжгүй байгаа иргэдийн асуудлыг хөндөж, дээрх шалтгаан бүхий иргэдийн визний сунгалт, оршин суухтай холбоотой зөрчил, торгууль зэрэг асуудлуудад хуулийн хүрээнд уян хатан хандаж, ойлгож дэмжлэг үзүүлж байхыг хүссэн юм. Сэжунру иммигрэйшний дарга тус иммигрэйшнд хамааралтай Түндэмүн, Монгол тауны орчимд монголчууд олноороо оршин суудгийг яриандаа онцлон дурдаж, дэмжиж ажиллахаа илэрхийллээ.
